FOMBA HENJANA KOKOA Lesona 4 hatao ny 23

FOMBA HENJANA KOKOA Lesona 4 hatao ny 23 Janoary , 2021

Nolavin'i Ahaza ny fanampian'Andriamanitra handresena ny fahavalony. Nijaly noho ny fanapahan-kevitra ratsy nataon'ny mpanjaka ny vahoaka Israely. Tsy te hihaino izy ireo, ka dia tsy maintsy nianatra ny lesona tamin'ny fomba henjana kokoa. Inona no hitranga? Tanteraka ny Tenin'Andriamanitra. Isaia 7: 15 -16 Ny vokatry ny tsy fankatoavana. Isaia 7: 17 -25 Nokapohina, nefa tsy rava. Isaia 8: 1 -10 Inona no tokony hataontsika? Matahorà an'Andriamanitra. Isaia 8: 11 -15 Aza mino lainga. Isaia 8: 16 -22

TANTERAKA NY TENIN'ANDRIAMANITRA “Fa raha tsy mbola mahalala handà ny ratsy sy hifidy ny tsara izany zaza izany, dia ho lao ny tanin'ireo mpanjaka roa maharaiki-tahotra anao ireo. ” (Isaia 7: 16) Tamin'ny 734 BC, dia nanambara mialoha ny Tenin'Andriamanitra fa raha mbola tsy mahay miteny tsara akory sy mahay manavaka ny tsara sy ny ratsy ny zaza dia tsy hisy intsony ny fanjakan'ny Israely sy Syria (Isaia 8: 4; 7: 16). Roa taona taty aoriana, tamin'ny 732 BC, dia babon'ny fanjakana Asyriana i Syria. Tamin'izay fotoana izay dia vao latsaky ny herintaona ny zanakalahin'i Isaia, ary mbola nibada. Roa ambin'ny folo taona taty aoriana, tamin'ny 722 BC, afaka nanapa-kevitra ny zanakalahin'i Isaia. Ravan'i Salmanesera V ny fanjakan'ny Israely ka nentina ho babo tany Mezopotamia sy Media ny Israely (2. Mpanj. 17: 3 -6).

NY VOKATRY NY TSY FANKATOAVANA “Jehovah hahatonga aminao sy ny olonao ary ny mpianakavindrainao izay andro tsy mbola nisy toa azy hatramin'ny andro nialan'i Efraima tamin'ny Joda. ” (Isaia 7: 17) Nampanantena Andriamanitra fa Izy no handrava ny fanjakan'ny Israely sy Syria, ka tsy nisy na inona ho nataon'i Ahaza tamin'izany. Saingy tsy nankatò i Ahaza ka nanao fifanekena tamin'i Asyria. Niankohoka tamin'ny andriamanitr'i Syria koa izy satria nino fa mahery noho Andriamanitra izy ireo (2 Tantara 28: 22 -23). Ary noho izany dia naniraka an'i Egypta sy Asyria (ny lalitra sy ny renitantely, and. 18) Andriamanitra hamely an'i Joda. Nampiasainy Asyria ho toy ny “hareza” nohofana handravana ny fanjakan'ny Joda (and 20). Tokony hatoky an'Andriamanitra hatrany isika. Tsy azo ihodivirana ny voka-dratsy rehefa mandà an'Andriamanitra isika ka miantehitra amin'olona ihany (Salamo 146: 3).

NOKAPOHINA, NEFA TSY RAVA “Dia himaona fatratra izy ka hihatra amin'ny Joda ary hanafotra sady mbola hisondrotra ihany mandra-pahatongany havozona; ary ny fipasany eny an-daniny roa dia hanenika ny taninao, ry Imanoela ô. ” (Isaia 8: 8) Nasain'Andriamanitra nosoratan'i Isaia ny anaran'ny zanany lahy manaraka teo anatrehan'ny vavolombelona, na dia mbola tsy nanan-anaka aza ny vadiny (and 1 -2). Ho famantarana ity zanakalahy ity (and. 18) toa ilay teo aloha [Seara-Jasoba], satria ny anarany [Mahera-salala-hasi-baza] dia midika hoe "Avy faingana ny famaboana, mimaona ny fandrobana. ” Fampitandremana izany. Ho baboin'i Asyria ny faritry Syria sy Israely. Saingy, tonga toy ny "rano be ny Ony" i Tiglato-Pilesera III ary nandroso hatrany. Noravany koa i Joda. Namindra fo Andriamanitra. Navelany "hahatratra ny vozony" fotsiny izy, ka dia tsy rava tanteraka i Joda. Avotra ny sisa.

“Nisy ihany anefa mpino tao Joda izay nitoetra nahatoky tamin'i Jehovah ary nandà tamim-pikirizana tokoa tsy handray ny fanompoan-tsampy. Koa tamin'ireo olona mahatoky ireo no nitodihan'Isaia sy Mika mbamin'ireo mpiara-miasa taminy tamimpanantenana fatratra raha mbola teo am-panatrehana ny fandravana ny Joda tamin'ireo taona farany niainan'i Ahaza izy ireo. Nanakatona ny varan'ny fitoerana masina, fa niteny anakampo tamim-pahatokiana kosa ireo nitoetra mahatoky ka nanao hoe: ‘Aminay Andriamanitra. ’ ‘Jehovah Tompon'ny maro, no hasino; ary aoka Izy ihany no hatahoranareo, dia ho fitoerana masina ho anareo Izy. ’ Isaia 8: 10, 13, 14” E. G. W. (Mpaminany sy Mpanjaka, tk. 27, p. 273, 274 )

MATAHORÀ AN'ANDRIAMANITRA “Jehovah, Tompon'ny maro, no hasino; ary aoka Izy ihany no hatahoranareo, ary Izy ihany no hangovitanareo. ” (Isaia 8: 13) Nananatra an'Isaia Andriamanitra mba tsy hanao izay ataon'ny ankamaroan'ny olona: tsy hatahotra izay atahoran'ny olona ary tsy hangovitra izay angovitan'ny olona (and 11 -12). Andriamanitra irery no tokony hasinintsika [hankatoavina], hatahorantsika [hajaina], ary hangovitantsika aza (and. 13). Matahotra marina an'Andriamanitra isika rehefa manaiky Azy amin'ny maha-fahefana faratampony Azy eo amin'izao tontolo rehetra izao. Raha momba anao Izy dia tsy misy na iza mahazo mikasika anao raha tsy mahazo alalana avy Aminy. Raha tsy miandany aminao kosa Andriamanitra satria nikomy taminy ianao dia tokony hatahotra Azy ianao.

“Tsy maintsy miankina amin'Andriamanitra ny saintsika, ary tsy tokony hatahotra toy ny tahotry ny ratsy fanahy isika, izany hoe matahotra izay atahorany, ary manaja izay hajainy; fa ho sahy sy hahery fo ho an'ny fahamarinana. Raha mba afaka sokafana ny masontsika, dia hahita ny endrik'ireo anjely ratsy manodidina antsika isika, mitady fomba vaovao hanelingelenana sy hamotehana antsika. Ary hahita ny anjelin'Andriamanitra izay miaro antsika amin'ny heriny koa isika; fa ny mason'Andriamanitra miambina dia mijery ny Israely mandrakariva, ary hiaro sy hamonjy ny olony Izy, raha mametraka ny fitokiany Aminy izy ireo. ” E. G. W. (Early Writings, p. 60)

AZA MINO LAINGA “Ary raha lazainy aminareo hoe: ‘Milà saina amin'ny manao azy ho tsindrian-javatra sy ny mpanao sikidy, izay mitsiaka sy miboerika. Moa tsy Andriamaniny va no tokony hilan'ny olona saina? Fa hila saina amin'ny maty ho an'ny velona va izy? ” (Isaia 8: 19) Ny ankamaroan'ny olona tany Joda sy i Ahaza dia nanaraka fivavahana izay nifototra tamin'ny fanompoan-tsampy, sikidy ary fivavahana amin'ny maty. Izany rehetra izany dia nifanohitra tamin'ny “Lalàna sy ny teni-vavolombelona” (and 20). Mbola misy mandraka ankehitriny io karazana finoana io. Mety tsy ho an-karihary ny fanompoana sampy, saingy feno finoana momba ny fifaneraseran'ny velona amin'ny maty izay manapa-kevitra na milaza mialoha ny ho avy ny kolontsaintsika. Ny spiritisma, ny filalaovana ody maoderina ary ny "New Age" no manaparitaka ity hafatra ity. Tsy maintsy miorina amin'ny Baiboly irery ihany ny finoantsika ary lavintsika tanteraka ireo lainga miafina ireo. Ny fandavana azy ireo dia fanehoana fahatokiana an'Andriamanitra.

“Ny olona tsirairay dia tsy maintsy mikatsaka ampivavahana fatratra hahafantatra ny Tenin'Andriamanitra ho an'ny tenany manokana sy ny fanatanterahana izany […] Amin'ny fahasahirananao ara-nofo rehetra, amin'ny fanahianao sy tahotrao rehetra, miandrasa ny Tompo. Aza mitoky amin'ny andriana, na amin'ny zanak'olombelona, satria mety ho eo amin'ny toerana azo itokiana izy ireo. Nampiraisin'ny Tompo amin'ny azy ny fonao. Raha tia Azy ianao ary ekena eo amin'ny fanompoana Azy, dia ento eo amin'ny Tompo ny enta-mavesatrao rehetra ary miandrasa Azy. ” E. G. W. (This Day With God, 14 Martsa)